Ko te Whakataunga mo Maraehara me Kopu Poraka.
Mo Hemi Tapeka Raua ko Mere Karaka
Mo Hemi Tapeka Raua ko Mere Karaka.
Mo te kereeme a Hemi Tapeka raua ko Mere Karaka:—
Kia whakaarohia raano te keihi a te Whanau-a-Hikatoa, hei reira ka whakataua ai te hunga i whaitake ki te whenua i mua atu i te raupatutanga, me te hunga i whaitake i runga i te whakahokinga i te whenua i muri iho i te raupatutanga.
Ki ta te Kooti whakaaro kahore ano kia kitea, i roto i nga korero kua whakina mai, he take tika ki te whenua a enei kai-tawari i runga i te take tupuna. Ko nga kai-kereeme me era atu kai-tawari e whakahe ana i enei kai-tawari, a e mea ana ratou he noho noa iho ta raua ki runga ki te whenua hei mahi-kai anake.
Ko nga kaumatua me nga rangatira o Ngatihokopu e kereeme ana i tetahi wahi iti anake o Kopu Poraka, a ko ta ratou take he pare, ehara i te take tupuna.
Kahore ano kia kitea e te Kooti he take i tika ai te mahara a Hemi Tapeka ko tana kereeme e neke atu ana i to tona iwi, a Ngatihokopu. I roto i tana korero, ka mea ia, kahore ia i te mohio he aha ra te take i whakarerea ai e Te Kooti Pakura tona take tipuna ki te poraka nui katoa, a i whakaturia ai e ia he take pare. Kati, ka whakamaramatia nei e te Kooti ki a Hemi, kia kore ai he awangawanga i roto i tona hinengaro, ka ki penei atu ki a ia, ko te take i kore ai a Mohi Turei raua ko Te Kooti Pakura i whakatu i te take tupuna, he kore take tupuna ano hoki.
E tino marama ana ki te Kooti, ko etahi o nga tangata o Ngatiporou e noho pohehe noa iho ana, e mahara ana ratou ma te ahunga mai i te tupuna anake ka whaitake ai ratou ki nga whenua i whai-mana ai tena tupuna ki runga. E kore te Kooti e whakaae ki tena tikanga, [unclear: a] ka whakapuaki, ka tautoko tonu, i tenei tikanga, ara kahore he take tika a nga Piri-Tipuna, mehemea kahore he take ke atu; engari, ma te noho tuturu me te noho marire ki runga ki te whenua, me te whakaae marire a te iwi e whai-mana ana, katahi ka kiia he take tika to [unclear: ratou—a] ki nga whenua kahore ano kia nohoia ana, ma te whakaae marire a te iwi e whai-mana ana [unclear: i] runga i ngatikanga Maori, katahi ratou ka whai take.
Mehemea he kereeme ta Hemi Tapeka, e tau ana ki runga ki Kopu Poraka, e uru ana [unclear: ki] roto i to Ngatihokopu.
Ko tona kereeme, ara, to raua ko Mere Karaka, kua patua, kua tukua ki raro.