Title: Proceedings of of the Kohimarama Conference, Comprising Nos. 13 to 18 of the “Maori Messenger.”

Publication details: Auckland

Part of: He reo ture nō te taha Kāwana / Language of the Crown

License: Creative Commons Attribution-Share Alike 3.0 New Zealand Licence

Na Tuhourangi.

E hoa,—Tenei nga whakaaro o tenei iwi o Tuhourangi ka korerotia atu ki a koe. Nau i mea kia korerotia nga whakaaro kuri me nga whakaaro pai.

Te tuatahi: ko te awangawanga ki ta korua raruraru ko Wiremu Kingi. E mea ana matou i he te hohorotanga o te panga o to whiu ki a Wiremu Kingi. Ko te he, kihai i rite ki ta Paora ki a Timoti—te 4 o nga upoko te rua o nga rarangi—"Kia riri, kia whakawa, kia tohe ki te manawanuitanga katoa, ki te whakaako." Mei whiua e koe ki tenei kupu, kua marama katoa, tatemea he tamaiti ia, he matua koe, he kai whakamarama i te ture o te tinana. Ko tenei, e tino hiahia ana matou kia houhia ta korua rongo ko Wiremu Kingi. Ki te mana i a koe tenei kupu rongo-mau ka mana hoki i nga tangata e raruraru ana i roto i tenei he, ka tatu katoa nga whakaaro ki te ture kotahi. Heoi tera whakaaro me te awangawanga.

Te tuarua: ko ta matou whakaaro mo te Kingi Maori. Ekore matou e pai, no te mea he take kore. E hara i o matou tupuna te mahi Kingi, nakonei i kuware ai matou ki taua mahi pokanoa. Ko ta matou tino whakaaro mo tera mahi, he whakakahore kia mutu. Te take e mutu ai, me kati nga huarahi taonga, e mutu ai tena Kingi. Ki te puta mai nga kau, nga witi, nga poaka, nga mea katoa, kaua e tangohia, kei puta te moni e kawea ana hei whakanui i to ratou Kingi; ko tenei, me waiho ratou kia rawakore ana. Na, ko tenei, mau tenei e whakatakoto ki nga taone, ki nga Pakeha e noho takitahi ana i waenga i nga iwi Maori. Tetahi hoki, whainamatia nga iwi Maori kua kuinitia, kia matau ai nga Pakeha i te haerenga mai ki te hoko i a ratou mea. Ki te rite mai tenei i a koe—enei kupu a matou—e kore e wheau ka memeha taua Kingi Maori. Heoi tera. Te tuatoru: tenei a matou whakaaro ka korerotia atu nei ki a koe. Te tuatahi, ko te whakapono, nau i homai ki a matou, tangohia nuitia ana e matou; no te mea kua kite matou i tona pai, me te oranga o te wairua me te tinana i roto i a Ihu Karaiti to tatou Ariki. Te tuarua, na te Rongo-pai hoki i tuhonohonoa ai nga iwi katoa ki te ngakau tahi, ki te whakaaro tahi. A, muri page 19 iho ko te ture o te Kuini, pai tonu matou. Nga take i pai ai, he mutunga no nga raruraru o te tinana, kua waiho ma te ture e whakaatea nga he. Kia kite iho koe i nga tohu o to matou urunga ki te kuinitanga, koia enei, ko te nohoanga o tenei iwi ki raro ki te karauna o te Kuini, ko te aranga ake o te kai whakawa i waenganui i a matou, me te runanga hoki hei pupuri i nga tikanga o te ture kia kore ai e he a mua atu, kia waiho ai nga he e takoto mai nei, ma te ture tena e titiro, kia tatu ai nga whakaaro ki nga mea o te Wairua. Ka mutu a matou kupu whakahoki mo au kupu i te nupepa nei.