Proceedings of of the Kohimarama Conference, Comprising Nos. 13 to 18 of the "Maori Messenger."
Na Ngaiterangi
Na Ngaiterangi.
Kohimarama,
Hurae 16, 1860.
E hoa, e te Kawana,—
Tena koe! Whakarongo mai! Ko o matou whakaaro i roto i o matou ngakau mo enei ture kua korerotia. Kaore rawa matou i kite he i a te Kuini, i a koe, e te Kawana; koia matou ka tomo atu nei ki a koe hei matua mo matou. No te mea hoki, "Kotahi hoki te Atua, kotahi te takawaenga o te Atua o nga tangata, ko te tangata, ko Karaiti Ihu,"—1 Timoti 2, 5. Koia matou i whakaaro ai i roto i o matou ngakau, e rua enei iwi e noho nei i Niu Tireni, he Pakeha he Maori, a, na te ture i whakakotahi; a, kua kotahi inaianei. Ko ta matou i pai ai ko te Kawanatanga, ko te homaitanga i te ture mo nga he nui, whenua, kohuru tangata; mo nga he iti, tona kai whiu ko te ture. Ka matapopore matou ki enei ture, u tonu matou; inahoki te kupu i a Matiu 5, 5, "E hari ana te hunga rangimarie, ma ratou hoki e noho te whenua." Heoti tera kupu. Ko tenei, e Kawana, kia rongo mai koutou ko to runanga! Kimi noa matou i te tahi kupu hei pehi mo te Kingi nei e hoki ai ki raro, kihai rawa i kitea. Ko te take i kore ai e kitea, i hokoa e ia te ingoa taumarutanga o te Kuini ki te ingoa Kingi Maori; na, heoi te mea i kitea e matou hei pehi mo te Kingi Maori nei, me whakaitiiti e tatou. Kaua rawa e whakawhawhaitia, no te mea hoki kua uru page 20 katoa nga rangatira Maori ki a koe, e te Kawana. Na, heoi te mea i kitea e matou, ko tetahi mohiotanga hoki o matou, e kore e tupu taua Kingi, i te hua kore, inahoki te kupu i a Matiu 7, 16, "Ma o ratou hua ka kitea ai." Heoi tera kupu.
Ko tenei, e hoa, e te Kawana. Ko nga pakanga ki Tauranga erua, ko tetahi he whenua, ko tetahi he rapu utu mo nga tangata i mate i a matou i tenei wa nei ano, i a Pepuere. Heoi, kei te pupuru matou inaianei i runga i te ture. E kore matou e huna atu ki a koutou, no te mea ka piri koki tatou, ara, ki to tatou Kuini atawhai. Tenei hoki tetahi: ko to matou whenua ko Tauranga, he iwi ke i mua, i a Ranginui. I whawhaitia e o matou tupuna, a riro ana i a ratou, ka tupu nga uri ka waiho iho ki a ratou, a, tae mai ana ki a matou i naianei. Ko nga momo whakaururu e tohe ana kia hoki ki a ratou, a, e kore e tika, no te mea hoki he toa no matou, kaore ano toku mana i hoki ki raro i tenei whenua. Heoi tena kupu. Tenei ano ta matou i whakaaro ai i roto i o matou ngakau mo nga ritenga o Waitangi. Koia na ano te tikanga, ma taua ritenga hoki ka tupu ai he painga mo enei ritenga kua korerotia nei e tatou. Ae, ka whakaae pono matou ki aia te mana, ara, ki a te Kuini, hei tirotiro mo enei iwi erua, mo te Pakeha, mo te Maori. Ae, ka piri atu matou ki a koe e te Kuini, e te Kawana; no te mea hoki kahore he mana hei pehi mo te Kuini, no te mea kua kotahi nei tatou inaianei.
E hoa, e te Kawana. Kia atawhai ki o tamariki Maori, Pakeha. Ko nga whakaaroaronga i roto i o matou ngakau, ara, kia tupu he painga ki Niu Tireni. Heoiano ta matou kupu ki a koutou, e te Kuini, e te Kawanatanga.
Na Tomika Te Mutu, Na Wiremu Patene Whitirangi, Na Hamiora Matenga Tu, Na Hamuera Te Paki.