Proceedings of of the Kohimarama Conference, Comprising Nos. 13 to 18 of the "Maori Messenger."
Na Ngatitama
Na Ngatitama.
E hoa, e Te Makarini,—
Kahore aku whakahe mo a te Kawana kupu. E mea ana ahau he tika tonu ana korero. Kahore ano hoki e taea e matou te hurihuri, te whakahe ranei. Tenei te mea e whakaaro nei, kahore ano au i rongo ki etahi kupu pai a nga rangatira katoa i karangatia nei e korua ko Kawana. Tenei taku kupu, kia rongo mai korua. Te ritenga e pai ai au, kia puta ta korua kupu akiaki ki nga tangata i waiho nei e korua hei kai whakahaere tikanga, kia whakamaharahara tonu korua i nga tau, i nga marama ranei, kei kuare tonu ratou, kia kaha ai hoki ta ratou whai atu i muri i o ratou tuakana Pakeha; aua ano hoki ratou e whakaououtia e korua, engari kia tokomaha ano ratou, kia ai te mangai o tenei o tera ranei, hei whakakaha mo ta ratou mahi; penei ka riro mai nga tangata ki roto ki ou painga.
E te Kawana! Ko taku tenei e pai nei, kia hanga tetahi ritenga mo toku kainga,—timata atu i Whakatu tae noa rano ki Aorere. E mea ana hoki au kia puta hohoro ake i a korua etahi kupu whakamahara moku i roto i nga tau, i nga marama ranei, kei mahi roa ahau ko ahau anake, a wareware noa iho ahau. Ki te noho tona kai-whakakaha, e kore ano hoki ia e mangere. Heotiano.
Na Wiremu Te Puoho.