Proceedings of of the Kohimarama Conference, Comprising Nos. 13 to 18 of the "Maori Messenger."
Na Ngatiraukawa
Na Ngatiraukawa.
[Kohimarama,] Otaki [ko tona kainga].
E hoa, e te Kawana,—
Kei te whakapai atu ahau ki a te Kuini mo te putanga mai o tona aroha, ki te tuku mai i ana minita, i ana pihopa, hei whakaora i te motu nei. Rokohanga mai te tangata Maori e tahuri ana ki te kai i a ia ano, na te whakapono i ora ai. Heoti ano tena. E hoa, e te Kawana, kahore ahau e whakahe atu ki au korero, ta te mea kua rongo ki te tika o au korero; ko te tika tenei, ka maha nga utunga o taua whenua; ko tenei, kei te tangata Maori te he. He kupu atu ano tenei naku ki a koe, kia tukua ake tetahi kai ruri mo o matou whenua, kia kore ai he tautohe i a matou. He kupu ano tenei naku ki a koe mo te kara. Ki te puta he whakatakariri mou ka tonoa ake pea e koe nga hoia, ka mea hoki koe ki a au hei hoia: kaore ahau e pai, ta te mea na te wehi hoki ki taua mahi i ahu mai ai ki a koe. Ki te whakangakau-kore koe ki taua kara, whakaritea he Pirihi hei tiaki mo nga toa i Otaki. He kupu ano tenei naku mo nga mea o te tinana——kia tukua mai te hota, te page 32 paura, te kiepa. He kupu ano tenei ki a koe, e te Kawana, otira ki au kai ruri. He whakahe tenei naku ki nga kai hoko whenua; ko te he tenei, kua whakaae koutou ki te tika o ta matou paunatanga i nga witi, i nga taewa, i nga mea katoa. No ta matou tohenga atu kia paunatia te whenua, kahore nga kai hoko whenua e pai. Ko tenei to koutou he, e tanu ana ano koutou i o matou kanohi ki te ritenga o te whenua. Ko tera korero au i te tuatahi, ira, he whakaatu naku i te manawanui a Ngatiraukawa i nga whawhai i Wairau, i te hopuranga o Te Rauparaha, i nga tohenga tangata o Ngatiapa, o Te Raneiri,—ko nga iwi tenei e tahuri ana mai ki te whakataratara; kahore a Ngatiraukawa i pai ki ta ratou mahi. Heotiano enei whakaaro.
Na Te Moroati Kiharoa.