Proceedings of of the Kohimarama Conference, Comprising Nos. 13 to 18 of the "Maori Messenger."
Na Ngatiawa. No. 1
Na Ngatiawa. No. 1.
Hurae 14, 1860
E hoa, e te Kawana,—
1. | Tena koe! Tenei aku kupu atu ki a koe. E rite ana nga ture o Ingarani, ara, nga whare turoro, nga kura, me nga kai-whakawa, e rite ana ena i te ture o Ingarani. |
2. | Na, tenei nga mea i hapa i nga ture o Ingarani, ko nga whenua ake o nga Maori ake, kahore ano i hokona atu ki te Kawanatanga, kahore ano te ture o Ingarani i runga i tena. |
3. | Na, me ui atu e au i konei ki a koe, he aha ra te ture o Ingarani te whakairia mai ai ki runga ki nga whenua penei, ara, te Karauna-Karatitia ai? |
4. | Na, ko nga kohuru tetahi o nga Maori ake, ki a tatou ano, kahore te ture o Ingarani i runga i tena. |
5. | Ko to te Maori whenua ake, e retia ana ki te Pakeha, kahore te ture o Ingarani i runga i tena, kei whai rawa nga Maori, ka kaipono i te whenua. |
6. | Na, tenei tetahi. Ahakoa tokotoru nga Maori i haere atu ki te korero ki o kai hoko whenua, heoti whakaae tonu ratou, ara, o kai hoko whenua. Ka haere atu te tokomaha ki te pehi i nga kupu o aua tangata tokotoru, kahore hoki e whakarongo mai o kai hoko whenua. |
7. | Na, ko te whenua o nga Maori ake mo te hahi o Niu Tirani, kahore te ture o Ingarani i pai ki tenei,page 52 |
8. | Ko nga tangata kahore e pai ki te hoko i te whenua he tangata kino ena ki te Kawanatanga. Heotiano ena. |
9. | He kupu ano enei mo to kupu e takoto nei i te 9 o nga rarangi, mo te haerenga o Waikato ki te whakauru i a Wiremu Kingi, hei hoa whawhai ki a te Kuini. Na, tenei taku mo tena. Ki te mea kaua hoki koe e tuku karere ki nga Pakeha o Poihakena, o tetahi wahi atu hoki, hei whawhai ki a Wiremu Kingi, ka tika tena. Mei waiho e koe ma nga Pakeha o Niu Tireni nei hei hoa whawhai mo Wiremu Kingi, tena ko tau, he tono mai ka hoki i nga Pakeha o tawahi hei whawhai ki a Wiremu Kingi; tena ko Wai kato, no Niu Tireni nei ano ratou. |
10. | Ko nga painga o nga Kawana ki Niu Tireni nei. Kawana tuatahi, tuarua, kahore matou i kite i nga painga o enei Kawana; kahore i marama nga ture o Ingarani i ena Kawana. Erangi na Kawana Kerei ka tahi ano ka marama nga ture o Ingarani ki tenei motu. Nana i whakahau nga huarahi o tenei motu kia mahia, me nga whare turoro, nga kura, nga kai whakawa Maori. |
11. | Ko ta Kawana Kerei mahi he haereere ki te titiro i nga Maori; ahakoa e rua tekau, e toru tekau Maori e noho ana i o ratou kai nga, na, kei reira a Kerei e titiro ana, e whakahau ana ki te mahi whenua, ki nga mahi pai katoa; ko tana mahi tena. |
12. | Kawana tuawha: kahore ano matou i rongo noa ki ou whakaaro, o tou taenga mai rano tae noa ki tenei takiwa. To matou rongonga ki ou whakaaro ko ta korua whawhai ko Wiremu Kingi, ko to hohoro tonu ki te tono i o hoia ki Waitara whawhai ai; ko ou whakaaro tena i rangona ai matou, ko to hohoro tonu ki te tono i o hoia ki te whawhai ki a Wiremu Kingi. Heoti, ohorere ana matou ki enei whakaaro ou. Heotiano. |
Na Wiremu Tamihana Te Neke,
Na Te Manihera Matangiruhau,
Na Hemi Parai,
Na Te Rira Porutu.