Title: Proceedings of of the Kohimarama Conference, Comprising Nos. 13 to 18 of the “Maori Messenger.”

Publication details: Auckland

Part of: He reo ture nō te taha Kāwana / Language of the Crown

License: Creative Commons Attribution-Share Alike 3.0 New Zealand Licence

Share:

Na Ngatiwhakaue. No. 2.

Tena ra ko koe! No te tekau o nga ra o Hurae i huihui ai matou ki tou aroaro ki te whakarongo i au tikanga pai.

2.	Na, e hoa, whakarongo mai ra, he whakapumautanga tenei no a matou whakaaro ki tou aroaro. Na, kua whakaae matou kia waiho ma te ture e tiaki o matou whenua me o matou taonga katoa.
3.	Ka pena ano te ritenga o ta matou inaianei me te ritenga o Waitangi.
4.	Na, ko te take tenei i tino whakaae ai matou ki a te Kuini kia whiua nuitia te tangata kohuru, kia whakawakia te tangata tautohe, me te tangata tahae, ara, me nga mea katoa e he ana ki te ritenga o te ture.page 16
5.	Na, e pa, ka piri pono ra matou ki a te Kuini. Me titiro iho ra e koe, kaore i huna, kaore i kaiponohia, engari kua tukua katoatia atu ki a koe, a kaore he take pouri hei whakahokinga atu ma matou i to kupu. Kua tatu nei hoki te ngakau, kua whakamaramatia atu ki a koe. A he aha ra te mea i mahue iho i a matou? I oti rawa i a matou te titiro; a, ko au tamariki katoa ka noho i runga i te ora me te ngakau tatu.
6.	Na, e pa, ko te mauahara i roto i te ngakau o te tangata, ma te Atua tena e titiro, a ko te mea e kitea ana e te kanohi ma te ture tena e whakawa. A, he tini ra nga Pakeha kua reo Maori, a he aha ra te take i whakaputaia ketia ai, te whakaurua ai matou ki roto ki o koutou runanga ki te huri-huri whakaaro mo matou mo koutou? A, tenei ano te whakatauki nei, "E tupu, e te ture, e awhi e te runanga!" Heoiano ena, ka mutu. Ka ahu enei ki te whakarite mo te taha Kingi Maori nei. Kimi noa matou i tetahi kupu hei pehi mo te Kingi Maori nei, e hoki ai ki raro, na kihai rawa i kitea. Ko te take i kore ai e kitea e matou, i hokoa e ia te ingoa taumarutanga mai o te Kuini ki te ingoa King! Maori. Na, heoi te mea i kitea e matou hei pehi mo te Kingi Maori nei, me whakaitiiti noa iho e tatou—(Ruka 14, 11). Kaua rawa ia e whakawhawhaitia ki te kupu, no te mea hoki kua uru katoa nga rangatira ki a koe e te Kawana. Ka tahi, tirohia atu e koe ki te take e tupu ai tenei mea te Kingi. Ka rua, na, ko a matou na kupu whakahe enei, mo te Kingi Maori nei. Na, ki te kore i enei, mau e whaki mai, inana! ira ra! Heoiano.

Ara, na te Runanga o Whakaue.