Proceedings of of the Kohimarama Conference, Comprising Nos. 13 to 18 of the "Maori Messenger."
Na Tapuika
Na Tapuika.
Kohimarama,
Hurae 13, 1860.
E hoa, e te Kawana,—
Whakarongo mai ki taku korero. Kahore he kupu i toe iho i au, heoti nano kei taku pukapuka. Ko taku kupu tenei, ko toku pai ko te atanoho, ko te kino ka mahue i au. Ko toku hiahia ko te Atua, ko te tangata nana i whakawhiti te ra ki Niu Tireni. Otira mana e kite mai i oku hara, tona utu ano ko au ano. Tetahi o aku e pai ai ko te Kuini; ko te pai ona, ko te tangata kino ka whakawakia, ka kitea tona he, ko ia ano te utu mo tona mahi he; ko te tangata pai ka ora ano ia.
E hoa, e Kawana. Tenei ano taku kupu ki a koe. Houhia te rongo ki tou hoa whawhai, ki a Wiremu Te Rangitake. Ki te mau ta korua rongo ka rite te kupu e korerotia nei i tenei nupepa i te timatanga iho o taua korero a Kawana. Ko te kupu tenei, "kia noho pai nga iwi erua i Niu Tireni."
Kei whakaaro koe ki tera Kingi. Kia mohio koe e rite ana ki te kuri e ngangara ana ki tetahi kuri i aia ta raua kai pai. Tetahi ona whakarite, o taua Kingi nei, ko Hatana, e mea ana hoki a Hatana he Atua ia.
Ko tenei, e hoa e Kawana, whakarongo mai koe ki taku kupu. Ki te pokanoa tetahi ki toku pihi kainga me kawe atu ki nga kai whakawa. Ko taku tena e pai ai, me whakawa i oku taonga katoa, ahakoa Maori, ahakoa Pakeha, ka whakawakia katoatia. Heoiano taku kupu ki a koe.
Na Moihi Kupe. Ki a Kawana Paraone.