E hoa e Te Kawana,—

Tenei to pukapuka kua tae mai kia matou. Ka nui te marama o korero, na konei i puta ai te mahara i roto i matou, ehara pea i a koe nga tikanga o mahia nei e o kai hoko whenua, kia matou kei te kore pea ia koe e mohio ki a ratou mahi, ina hoki he ahua ke ki roto ki to pukapuka he ahua ke ki te mahi a o kai mahi. Koia hoki matou ka tuhi atu nei, kia whakaae mai koe ki ta matou kupu kia whakamutua te kakari ki Taranaki, kia kimihia te take o te riri, kia kitea na te Maori te he, kia kitea marama to riri, kia kitea ranei na o kai mahi te he, kia wawe te whakamutua te whakaheke toto harakore, engari me whakawa; a tae ana mai ki enei he e takoto nei i o matou aroaro. Heoti tena kupu kaua ia na e tirohia mai te itinga o ta matou kupu, ina kotahi rawa ake ta matou kupu na roto rawa i o matou manawa, he kupu hoki e tumanakotia ana i te ao i te po, he oranga ngakau no matou. Tenei hoki tetahi, ko to kupu whakatupato, kia kaua matou e whakarongo ki nga korero parau a te Pakeha a te Maori; kia whakatupato atu hoki matou ki a koe mo nga korero parau, e kia nei, he kakari ta te Maori ki te rangatiratanga o te Kuini; kahore, he kakari tonu ta te Maori mona kainga e tangohia ana i runga i te hoko he a o kaimahi, i enei tau ka hori ake nei. E hoa tau hou ana te taringa ki te whakarongo atu ki o kotero i tuhi mai nei; ekore matou e kimi atu i etahi kupu hei utu atu i o korero, kaore, ko korero ano e whakaatu ana i te he, ko taua he kai te takoto noa o korero kaore hoki he mananga o au kupu ko te he, ara, he kupu tuturu mau e mohiotia ai e matou, ina te kupu e rangatira ai, houhia ki te rongo, ka tahi ano matou ka mohia he kupu rangatira tenei, me pare atu kia te Kuini kia homai he kai whakawa mo tenei he, kia whakamutu tenei whawhai.