Tena te pukapuka o nga tangaia o Taranaki, ka tukua atu nei ki a koutou; kimihia e koutou nga hua o roto. Ki ta matou nei titiro, he hua pai anake kei roto kei tenei pukapuka; ta te mea, kua aro mai te whakaaro o nga tangata o Taranaki ki a Kawana Kerei, kua karanga mai ratou kia whakawateatia a Tataraimaka me nga whenua katoa i hokoa e te Pakeha.

Ko te tini o nga Maori e titiro whakatau ana ki a Kawana Kerei i a ia e noho mai nei i Taranaki; hopohopo ana te ngakau, pouriuri ana te hinengaro, hua noa he kino kei tona haerenga. Otira e kite nei tatou, he tikanga marama ona, he tikanga atawhai tangata, he tikanga whakaora tangata. Ko ta te Kawana i pai ai, ko te Pakeha raua ko te Maori kia takahoa tetahi ki tetahi, kia whukamatua, kia whakatamaiti, kia whakatuakana, kia whakateina.

Aua te mauri o te tangata e oho rere, me ata matukitaki te tangata ki nga hua o te pai e moiri nei ki rau whenua, ki rau tangaia. Kaua hoki te tangata e mauahara, e mea kia utua te kino ki te kino, kia utua te he ki te he; na te; mea, kua whiti mai te maramatanga ki tenei motu, a ko nga mahi o te pouritanga, kua karangatia e tatou kia whakatorengitia ki te kopu o te po.

Ko Taranaki te kainga i meatia e nga iwi, hei whakawhiwhi i a tatou ki te pakanga, -hei whakatutu ano i te aiotanga o to tatou moana, tawhio noa; heoi, e pai noa iho ana Taranaki, e whiti ana tona ra, e aumoe ana ona wai, e tapapa ana ona tangata; a kua karanga te tangata, me mutu i konei nga he, nga whakatutu, me whakarongo tatou ki te reo atawhai o to tatou matua o Kawana Kerei, kia mowairokiroki ai te moana o Niu Tireni, a takoto ake nei.