Ki te Runanga huihui o te motu o Nui Tireni,—

E hoa ma tena koutou kua kiia koutou hei matua mo nga iwi katoa o te motu nei; ahakoa kiri ma, ahakoa kiri parauri, ahakoa tutua ahakoa Rangatira.

Koia matou ara tenei iwi o koutou a te Arawa, i kaha ai te korero i te mate nui e aki nei i runga i a matou kia rongo koutou a kia rapua e koutou tetahi huarahi e puta ai matou ki te ao-marama. Kia aro nui mai o koutou ngakau, ata whakarongo mai hoki o koutou taringa.

I te 2 o nga ra o Hurae, 1865, ka kohurutia a Hemi Mautaranui me ona hoa pakeha ki Whakatane e te Hura ratou ko ona hoa ka rongo matou i taua mahi kino, ka tomo te pouri me te mamae ki roto ki o matou ngakau. Ka haere matou ki te Tumuaki o to matou takiwa ki a te Mete, ki te kimi tikanga, ka ki mai ia kia matou, me haere i runga i te tikanga o te ture katahi ka tukua te warati hopu i aua kai kohuru ka tonoa hoki matou hei tai tuara mo te kai kawe i te warati. Ka haere matou i runga i taua tono ka mau etahi o taua iwi ka rere ko Hoera ko tetahi o nga kai kohuru, karanga noa atu matou ki taua tangata kia kaua e oma, kahore i rongo, na ka puhia ka mate, ka hoki mai matou ki Maketu, e hia ake hoki nga rangi e noho ana i Maketu, ka tonoa ano matou, e ka tahi te iwi nui tonu ka haere. Kahore matou i titiro ko te takiwa tenei o te rumakanga kai ki te whenua kahore matou i mahara ki a matou wabine ki a matou tamariki i whakaaro tonu matou ko te iwi pakeha, hei matua mo matou, tahuri ana matou ki te whakamana ki te hapai i te Ture. Ka mahi nei matou taea noatia te mutunga. Kahore matou i whakarere i te matou mahi i te takiwa kahore ano i oti. Erangi tohe tonu matou tae ana te mutunga.

Na kua hoatu e matou nga tangata kino ki o koutou ringaringa kahore i rere tetahi i a matou kahore i tukua mai e koutou he pakeha hei tai tuara mo matou heoi ano tau ko te hawhe o te kai, naku ano te nuinga, kati tera.

E waru tekau o nga ra i tu ai ahau ki tenei riri kahore matou i hoki whakamuri no nga ra whakamutunga o Oketopa ka mutu ta matou mahi.

I nga ra whakamutunga o Mei ka tae mai te Minita Maori ki Maketu ka ki ia i ana ki whakawhetai mo te tika o te mahi a te Arawa ka whakaaro matou kahore matou e ora kit e kupu whakawhetai, ka tahi taua Minita ka ki i te ki rawakore o te Kawanatanga. Ka whakina mai e ia te kotahi mano pauna me te rima rau i runga i tenei ka nui to matou pouri ki te iti o tenei moni tangi rawa matou mo a matou wahine mo a matou tamariki. E hoa ma kia marama i a koutou to matou mate nui ko te takiwa i whakatika ai matou ki te hopu i nga kai kohuru ko te takiwa o te koanga mutu rawa ake te mahi kua tae ate raumati kua mahue ke te ruamakanga kai, na kua mate rawa matou i naianei. Titiro hoki ki to matou mauiui ki to matou kuhunga ki roto ki te mate, kahore to iwi a te Arawa i titiro ki te ao marama. Tena koia mehe pakeha ka pai ranei ratou ki tenei utu ki te £2 5s., mo te tangata kotahi mo nga marama e toru ko ta matou mahi i oti rawa ma koutou e titiro nga moni i pou i a matou i runga i te mahi, oti titiro hoki ki te mahi a to koutou ope i whakau nei ki Opotiki hei hopu i a Kereopa raua ko Patara, kahore i oti kahore aua tangata i mauna ma koutou e titiro nga moni i pau i tera ope kahore ranei i tae ki te whatekau mano pauna. Kia matou ki ta te kuare kahore he rawakore o te Kawanatanga ina ka whiuwhiu noa i te moni i runga i te mahi kahore i oti. Titiro e hoa ma aroha mai ki to koutou iwi kua mate rawa i runga i tenei mahi nui tukua mai hoki tetahi apiti mo enei moni kia noho tika ai matou kumea ake to koutou iwi i tenei mate nui.

Heoi ta matou inoi atu ki a koutou whakamana te kupu a to koutou iwi.