.gif)
Ki a Wikitoria, te Kuini o te Rangatiratanga, kotahi o Kereita Piritone, raua ko Aerana; [gap — reason: illegible] me tenei motu ano hokî, e tiakina nei ehoki, e tiakina nei e tou atawhai.
Ko matou ko nga Rangatira, me nga tangata o etahi o nga Hapu, o nga Iwi o Niu Tireni; e noho nei i raro i tou Rangatiratanga. Te tuku atu nei i ta matou Pitihana inoi ki a koe, mo ta matou tangata i pai ai; mo Ta Hori Kerei (Sir George Grey, K.C.B.) kia whakatuturutia, hei Minita, mo te taha Maori, ki roto ki te Kawanatanga, o te Koroni o Niu Tireni. Hei whakahaere hoki i nga tikanga, e ora ai, e tika ai, hei whakaputa hoki ia matou, i raro i nga Ture taimaha, ina whakatakotoria, hei pehi kino i ou iwi e rua, i te Maori, i te Pakeha ano hoki. A, i runga ano hoki, i ta matou whakaaro mo tenei mea; he pai mo taua tangata kia tu hei reo mo te Koroni o Niu Tireni; ki roto ki te Paremete nui o Ingarangi.
Take tuatahi—He pai no nga tikanga i a ia e Kawana ana mo tenei motu.
Take tuarua—He mohio nona ki nga tikanga a te Maori raua ko te Pakeha; e noho nei i Niu Tireni.
Take tuatoru—He mohio hoki no matou he uri Rangatira tenei tangata.
Heoi ra, kia ora tou Rangatiratanga, kia mana mai hoki te inoi a tou iwi.