10
Te Pua a Hine-mahanga

Na, ko Hine-mahanga ko te wahine tenei nana i taki te manu, e karangatia ana tona whakatauki: 'Ko te pua a Hine-mahanga.' Ko te take i takina ai e ia te manu he tangihanga no tona mokopuna ki te manu a tetahi tamaiti, katahi ka takina e ia te manu. Ko te manu tuatahi nana i noho tuatahi te whare o Hine-mahanga he kopara, no muri nga manu katoa. Nui atu te manu e haere ana ki tenei pua taki, kaore nga manu katoa e wareware ki te pukepuke i tu ai te whare o Hine-mahanga tae noa mai ki tenei whakatupuranga. Kaore hoki nga manu e wareware ki te wai i tukua ai nga kaha a Hine-mahanga; kaore hoki nga manu e ware-ware ki nga rakau i whakaritea e Hine-mahanga hei noho anga mo nga manu. He pono enei korero, i kite ano matou, a i matakitaki ano ki te mahi, ki te mana o Hine-mahanga i te takiwa i takina ai e ia te manu. Tahuri tonu ki te tohu, hoki rawa mai tona tane, a Patea, kua tu te whare hinu a tona wahine; ka mate tona tane i te whakama, kaore hoki ana hinu, a Patea; patua iho tona wahine, a Hine-mahanga, ka mate. Me he mea kaore a Hine-mahanga i patua e tona tane penei kua takina ano te pakake ki Manawarakau; ka oti nga pou mo tona kupenga, ka patua nei e tona tane, kore tonu atu e oti te mahi mo te pakake e u ai ki uta.