26
Te whare mata me te whapiko rau huka

Na Tamarau Waiari (Tuhoe)

Ko nga rau ti he mea haehae ki roto i te whare mata, he whare whapiko rau huka tena, a he ta mahanga hoki te mahi o taua whare. Kaore e tae te wahine ki taua whare, te kai ranei, kia maoa rawa te umu rau huka katahi ka noa taua whare me nga tangata, katahi ka haere nga tangata ki te moe i o ratau wahine. He whare motuhake tena mo taua mahi, kaore he mahi ke atu. Katahi ka haere, ka heria aua rau huka, aua mahanga ra, ka taia ki runga ki te kahika, ka whakairia. Na, ka mau nga manu tuatahi katahi ka homai ki te hapi rau huka, a ka kainga e nga tohunga, katahi ka noa aua tangata. Ko nga rau ti he mea karakia, he rau huka te ingoa o te karakia.