E hoa e Kawana Kerei,—
Tena ra ko koe, e hoa. Kua oti te mahi a te Runanga Maori i huihui mai nei ki toku kainga ki Peria o Matamata, kia rongo mai koe, kihai i ata marama te mahi a tenei Runanga Maori. Ki taku whakaaro he reo ano to tetehi tangata, he reo ano to tetehi, ko nga kupu i whakatuturu—tia e taua Runanga, ko te rori kaua e whiti i Mangatawhiri, ko te poti nui kaua e rere i roto o Waikato. Ko enei kupu kua waiho hei ture ma ratou. Heoi ano nga kupu i marama ki taku whakaaro, na Matutaera Potatau,.ko tana kupu tenei, whakarongo e nga iwi o te Nota, o te Weta, o te Hauta, he kiri mangu tatou kia ma a roto, he rangatira ano tatou kia mau ki te whakapono, Ki te ture, ki te aroha. Hoi aku kupu marama, ko te nui o nga kupu a nga rangatira katoa kaore e ata marama. Ko etahi e whakatika ana ki te kupu, ko etahi e whakahe ana; ko tetehi kupu e mea ana me whakawa a Waitara, ko etehi rangatira e pai ana kia whakawakia taua wahi, ko etahi e kino ana, e hoa he kino noa iho nga kupu, ma te aha e tuhituhi atu, mau e whakarongo ki te korero o te Pihopa o Nuitireni, ka rongo koe i te tika, i te he, o tenei huihuinga kia ia.
Heoi ano na Te Raihi, kia rongo mai koe, kei nga ra o Nowema o Tihema ranei ka haere atu matou kia kite i a koe kia rongo hoki i tau kupu, i tenei tau ano.