E Hoa E Whititera,—

Tena koe. He tuhi atu tenei na matou, kia mohio koe ki o matou whakaaro mo te whenua e hokona nei i Hoani Meihana raua ko Tapa te Wata kei te taha ki Oroua o Rangitikei kaore matou e pai nga rangatira me te iwi katoa kia hokona taua whenua, hei wahi tuturu tenei mo matou; ka timata te rohe i Whitirea wahi o Manawatu ka ahu atu ki te moana rere atu i Whitirea, ki te Atatuhi rere atu, ki tupere ka whati i reira te rohe ka tae ki Kaikokopu, rere atu Akahuera, rere atu Omanuka rere atu Puketotara, rere atu te Kawau, Totarataepa, te Kopuapokororo, te Puta, Whakamoetakapu, Paeroa, Papauku; ka whati i reira ka rere atu ki te Umutoi, wahi o Oroua haere mai i roto o Oroua, a te Awahuri rere tonu mai ano i roto o Oroua a Puketotara, a, ka kati ano ki Whitirea, ko matou nga kai pupuri o tenei wahi, ara o te taha ki Oroua ki Manawatu, tera ano etahi tangata kei te taha ki Rangitikei o pupuri ana, kua tae atu pea ratou kia koe ki te whakaatu i o ratou whakaaro me o ratou ingoa, heoi ka kite iho koe i o matou whakaaro mau e tuku atu ki tou Runanga kia kite hoki ratou. Heoi ra a matou kupu ki a koe.

Na matou, na nga tangata o, Ngatikauwhata, o Ngatiwehiwehi.