Other formats

    Adobe Portable Document Format file (facsimile images)   TEI XML file   ePub eBook file  

Connect

    mail icontwitter iconBlogspot iconrss icon

Ripoata mo te Pire whakanohonoho ki te Tangata Whakahaere hoki i nga Whenua Maori, 1898

Appendix L. — Petition to Her Majesty the Queen. — [Translation.]

Appendix L.
Petition to Her Majesty the Queen.
[Translation.]

Ki to matou Kuini atawhai ki a Kuini Wikitoria.

He mihi aroha atu tenei na to Iwi Maori o Niu Tireni ki a koe ki to matou whaea, kai awhina hoki i raro i nga whakaaetanga o te Tiriti o Waitangi.

page 142

Tena koe i raro ite atawhai o te Atua, nana nei ou ra i whakaroa e noho ana i runga i te Torona ou tupuna. A e tino tumanako ana matou o tamariki aroha kia whakaroaina atu ano ou ra e to tatou Matua i te rangi.

Ko Niu Tireni hoki to tamaiti tuatahi i whanau tnai nei i a koe i muri iho i nga ra o tou whaka-kuinitanga. A ka inoi atu nei hoki matou ki a koe kia atawhaitia e koe to iwi Maori e noho nei i enei Motu i raro ano i to mana. He mea pai, he mea nui rawa hoki, hei tohu mo te roanga o ou ra e Kuini ana mo matou, kia pai koe ki te whakaae i tetahi tikanga rahui tuturu, e toe ai te morehu o ou matou whenua hei wai-u mo to iwi Maori ake, ake. Ina hoki o te timatanga mai ano o te Koroni tae mai ki naianei nui atu i te ono tekau miriona eka kua riro atu i te Pakena me te Karauna, e rima ano miriona eka nui atu iti iho ranei e toe ana ki to iwi Maori i naianei

Kei te hiahia o iwi Maori ki te mahi oranga ano mo ratou i runga i o ratou morehu whenua, i runga i nga huarahi mahi paamu, a ko nga wahi kaore e taea e matou te mahi, kei te whakaae matou ki te reti atu i runga i nga huarahi whakanohonoho tangata.

Engari kaore o iwi Maori e hiahia ana kia riro atu aua morehu whenua i o matou ringaringa, he mea kua tino mohio matou, heoi nei ano te wai-u mo matou me o matou uri, ake, ake.

Kaati, e rite ai tenei inoi ki a koe a o iwi Maori, me paahi rawa he ture hei tino kati, hei tino arai i te Pakeha noaiho me te Karauna kia mutu te hoko i o matou morehu whenua.

Kua kore hoki nga raruraru i oho ai nga ngakau o nga iwi e rua i nga ra o mua, kua noho pai i naianei i raro i to maru, penei hoki me nga tini iwi i raro i to mana, e tatua nei i te ao katoa.

Heoi, kia ora koe e te Kuini, ma te Atua koe e mauaaki, e tiaki, me to whanau, me au Minita me au kai-whakahaere katoa i raro i to mana.

E Ihowa Tohungia a te Kuini.

Approximate Cost of paper.—Preparation not given; printing (1,000 copies), £825s. 6d