Other formats

    TEI XML file   ePub eBook file  

Connect

    mail icontwitter iconBlogspot iconrss icon

Nga Korero Paramete: 1886-1890

Nga Maori O Rotorua

Nga Maori O Rotorua.

Timi Kara.—I patai ki te Minita Maori mehemea ka whakawhiwhi te Kawanatanga i nga Maori mahi kore i te Takiwa o Rotorna. I runga i taua patai, i hiahia ia ki te whakamarama atu na runga i etahi huarahi maha i tino mate ai nga Maori o taua takiwa. Ko tetahi o aua mate ko te hunga o Tarawera, ko tetahi ko te whakauaua o te noho o te kooti mo nga marama e ono me te mate o nga kai. I whai mahi ano nga Maori o Rotorua i muri tata ake i runga i te Reriwe o Rotorua a i pai rawa ta ratou mahi i hoki iho hoki te utu o ta ratou mahi i ta nga pakeha. Ka tono ia ki te. Kawanatanga kia whiriwhiria to ratou mate, a mehemea e whakahaerea ana etahi mahi nunui e te Kawanatanga i taua takiwa me hoatu tetahi mahi me tuku atu ranei i tetahi ora mo ratou, kihai i tau tana tono mo te iwi o Rotorua anake engari mo nga iwi o Ngati Rangitihi me te iwi o Tarawera hoki no te mea he nui ano hoki to ratou mate.

Te Miterehana.—Tana whakahoki i mea e rua nga pitihana tono mahi kua tae mai ki a ia a nga Maori o Rotorua me te ki mai he nui to ratou hemokai. Ko aua pitihana kua tukuna ki a Tuari me Hanata he kai whakahaere raua no te Reriwe o Rotorua, me te patai atu kia raua kia kimihia mai mehemea he tika nga korero o aua pitihana, a mehemea he tika kia tukuna tetahi mahi ma aua Maori. Me ki atu ia kia whakaritea kia tukuna tetahi mahi i runga i te pito o te Reriwe i Rotorua kia ahei ai te tuku i tetahi mahi ma ratou (ara) ki te mea he tika nga korero o te pitihana e ki nei e tino hiahia ana nga Maori ki tetahi mahi hei kimi oranga mo ratou.