Taite, te 8 o Akuhata, 1889.
C. R. Paawuru.

Taiwhanga.—E patai atu ana ahau ki te Kawanatanga mehemea ekore e taea te whakahaere tetahi tikanga i muri iho i te mutunga o tenei Paremete hei whakamana i te tono a nga Komiti o nga Whare e rua mo te whiu i te roia i oma nei i a R C. Paawuru? Ka toru nga Paremete i patai ai ahau i tenei patai a kore ake he kupu whakamana i aku tono. Tenei ahau te tumanako nei kia kaua he mauahara a te Minita o nga whakawa ki ahau; otira kua roa e takoto ana tenei mea, mehemea i te tu tonu te Kawanatanga o mua atu i tenei kua tae noa mai taua tangata te whakahoki mai. Kei taku ringa nei tetahi pitihana a tonoa ana e te Whare o runga kia whakamana e te Kawanatanga te inoi o taua pitihana, ki taku whakaaro e haere taha tahi ana te Ture. He take tenei e pa ana ki nga Maori anake, kihai rawa te ture i titiro kia ratou. Na, tera tetahi tangata kua kiia he tangata kohuru a pau katoa tenei ahiahi i te korero mo taua tangata, heoi kahore taua tangata e taronatia; na tenei tetahi tangata i oma a kahakina ana e ia te tini o te moni hoi kua mea te Kawanatanga me muru te hara o taua tangata no te mea e pangia ana ia e te mate a kahore e ahei te whakahoki mai kei hemo ia i te mauranga mai. Otira ka rua nga tau kua pahure i muri iho i tona panga e te mate a kahore ano ia kia hemo. A ki taku mahara ekore taua tangata e hemo i roto i nga tau e rua tekau e haere ake nei ko nga rongo i tae mai ki ahau i Akarana kei Mereponi ano taua tangata a kei te ora ia, a ki taku mohio kei te mahi taua tangata i ana mahi roia, ko taku i hiahia ai kia whakahaerea e te Kawanatanga tetahi tikanga mo runga i tenei take.

Te Pakuha.—Ki te rongo te Kawanatanga kua ora taua tangata ka tonoa e ratou kia whakahokia mai ki konei.