page 42

Taite, te 28 o Akuhata, 1890.
Waipiro Poraka.

I tukua mai e te MOKA ki te Whare te ripoata a te Komiti Mo Nga Mea Maori i runga i te pitihana a Tata Nihoniho me etahi atu. I penei nga korero o taua ripoata kahore ratou te Komiti e kite i tetahi take e whakahau ai ratou i te Kawanatanga kia hanga tetahi ture hei whakawa ano i Waipiro Poraka, a ka motini ia kia whakatakoria te ripoata ki runga i te tepu o te Whare.

Taiwhanga.—Ka motini ahau kia whakahokia ano tana ripoata ki te Komiti mo nga mea Maori. Ko te take i penei ai taku tono notemea tokotoru tokowha anake ranei nga mema o te Komiti i reira i te whakataunga o taua ripoata. He take nui to taua pitihana, a e whakaaro ana ahau kia tokomaka mai nga mema o tana Komiti hei whakatau i tenei keehi. Tokowha anake i tae ki taua Komiti i te whakataunga o taua ripoata a i tono te mema Maori mo te Tai Rawhiti kia nukuhia te whiriwhiringa o te ripoata mo tetahi atu rangi.

Te Moka.—E whakahe ana ahau ki te tono kia whakahokia ano te ripoata ki te Komiti. Erangi e whakaae ana ahau ki ta te mema Maori mo te Taha Whakararo e ki nei tokowha anake nga mema i tae ki te Komiti i te ra i whakataua ai taua ripoata. Otira kua oti taua ripoata te whiriwhiri e etahi atu mema tokotoru tokowha ranei a i whakaae tahi ratou me te mema mo te Tai Rawhiti ki taua ripoata. Kahore e tae mai nga mema o te Komiti Maori ki taua Komiti note—mea e kumea tonutia ana e nga rarurara o etahi atu Komiti. Mehemea kei te mohio nga mema tokowhitu o nga mema tekau ma rua ki nga korero o taua ripoata a i whakaae ratou kahore ahau e kite i tetahi he i runga i ta ratou whakaaetanga, me ki ake e ahau ki te Whare kahore te mema i whakahe nei ki tenei ripoata i whakahe i roto i te Komiti i te takiwa i korerotia ai taua ripoata erangi i whakaae tahi ia me era mema o te Komiti. Heoi e mea ana ahau kahore e tika kia tukuna tenei motini a tana mema ki te aroaro o te Whare notemea kihai ia i whakahe ki te tuhinga a te Komiti. Me ki ake hoki e ahau i nui te whiriwhiringa a taua Komiti i tenei keehi. He roa noa atu nga korero no reira kahore he tikanga e whakahohatia ai te Whare ki te korero atu i aua korero. Erangi e tino marama ana tenei ki ahau ka tonoa e taua Komiti kia tuku mai nga korero katoa mo runga i taua keehi.

Timi Kara.—I te aroaro ano ahau o te Komiti i te ata i te tuhinga o te ripoata erangi i kumea ahau ki tetahi atu Komiti me taku ki atu me nuku te whiriwhiringa o te ripoata mo tetahi rangi kia tokomaha mai ai nga mema hei whiriwhiri. I mahara ahau i whakaaetia taua tono aku i te wa i puta mai ai ahau i taua Komiti, no naianei ka tahi ahau ka mohio kua paahitia te ripoata, erangi me ki ake ahau kahore he mea i roto i taua ripoata e whakahe ai ahau.

Taiwhanga.—Ko te take i kore ai ahau e whakahe i te wa i korerotia ai te ripoata e te Tiamana i te tuatahi, notemea i whakahe te mema Maori mo te Tai Rawhiti a i mahara ahau kua whakaae te Komiti ki te tono a taua mema, ki taku mahara i whakaae ratou a no muri iho ka rere ke o ratou whakaaro. Ki taku mahara me tuku ano tenei pitihana ki te Komiti kia whiriwhiria mai ano e ratou. He take nui taua keehi, no reira e mea ana ahau me whakaae te Tiamana ki taku motini a me kaua e pootitia.

Te Moka.—I he taku ki atu ki te Whare e wha anake nga mema i te Komiti i te whakataunga i taua ripoata erangi e rima te mea tika—a

Whakaaetia ana te motini.