Koia Nei Nga Painga E Puta Mai Me Ka Mahia Houtia He Ture E Te Paremete.

Me tu tonu tetahi Kooti Whakawa Whenua Maori, me te ture ano mo te whenua Maori, no te mea, e tika ana kia tu tonu tetahi Kooti mo nga mea nana, kahore e taea te whakarite, me tetahi ture e kaha ana mo te katoa. Otira, me mutu te Kooti Whakawa Whenua Maori, me nga ture mo nga whenua Maori i raro ra i nga ture e whakahaerea ana i naianei. Ko nga ruuri utu nui nei e kore e whakaaetia i raro i nga whakahaerenga hou nei. Ko nga ruuri wehewehe ka whakarereketia, kia mama haere ai te mahi mo aua ruuri. Ko nga tino ruuri ko aua ruri i nga whenua hai whakanohoanga tangata, pena me nga whenua o te Karauna e ruritia ana. Ko nga rohe i waenga i nga iwi me waiho i te maunga, i te awa ka maakatia e te kai ruri ki te mapi, e hara i te mea hai rohe mo te whenua, engari mo te wehewehenga o nga mea i puta mai o runga i te whenua. Me pena ano nga rohe te whakatakoto i waenga i nga hapu. Ko te mahanga hoki o nga whakawakanga keehi i nga Kooti, me nga mea kino e tupu ana i aua Kooti ka iti haere. Tena, e oti i nga Komiti i nga runanga te whakarite i nga rohe me te hunga nona. A, ko nga keehi tino uaua ka kawea, ma te Kooti e whakaoti i runga ano i nga korero i puta ki te aroaro o te runanga. A, no te mea ka taea te riihi, te aha ranei i te whenua i te mea kua uiuia noa ihotia te hunga no ratou te whenua, a, ka waiho, a muri ata whakawa ai. Na, no te mea ko nga page 19take e whakaputaina ana e te Poati i raro i nga tikanga kua whiwhi i te kahanga o te ture; e kore e tirotirohia e nga Tiati nga tikanga, ka kore hoki nga Kooti whiriwhiri mo te hoko tahae. Kaore he tiiti Maori i uru nei te tahae, te pohehe, te utu nui, nga tuku tahae ranei, me te raruraru noa iho. Ma konei e ora ai te iwi Maori, na te mea, ka marama nga tikanga whakahaere o te Poati Whenua Maori. Ko nga whenua hoki a te iwi Maori ka whakamahia mo te pai o te Katoa.