Ki a te Pokiha te takawaenga o nga tangata Maori o nga Pakeha. E hoa, tena koe, kihai ahau i kite i to pukapuka pahemo ahau ki Hanraki i te 22 o Tihema, i te 25 i tae atu ahau ki Kauaeranga, i te Hatarei i pahemo to pukapuka ki Wharekawa, i te Wenerei kua tae mai ahau ki Piako, i te Paraire kua tae mai ahau ki Peria, ka kite ahau i te Pukapuka o te Paama i reira e mea ana, kei Tamahere koe e noho ana kei te whanga mai i au, i te Hatarei katahi ka haere mai ahau ki Tamahere, he rangi kino taua rangi kihai ahan i tae mai ki Tamahere, i wiki ki Maungakawa i te 6 o nga ra i haere iho ahau ki Tamahere, ka puta mai a Piripi ka patai atu ahau, kei hea a te Pokiha? Ka mea mai a Piripi, kua hoki atu ki te taone. No te aha i hoki ai ? No nakuanei. Heoi ka nui taku pouri moku kihai i kite i a koe, i te 11 onga ra ka tae atu ahau ki Ngaruawahia ki a te Ahiwera, ka korero mai a te Ahiwera, kua hoki to hoa a te Pokiha. Te take i haere mai ia, kia whakaritea etahi tangata mo Waitara me tetahi Pakeha mohio, whai whakaaro, hei whakawa i Waitara. E Hoa ka nui te tika o to korero, ka nui hoki te pai i mua, i te mea e whawhai ana, ko te take i man ai te rongo he mea kia mutu te whawhai, kia ata whakaaroa te tikanga mo Waitara, kia kitea ai te tika o Kawana Paraone, kia kite a ai te he o te Rangitake, ta te mea e kore e kitea to raua he ki te whawhai tonu, koia ahau i ki atu ai kia te Tienara, Haere o hoia kia hoki nga tangata Maori ki o ratou kainga. Waiho ma te ture Waitara e tiaki. Ma te tangata pai o te Kuini e whakawa ara ma te tangata e tukua mai e te Tuku Nukatere hei kai pehi i nga raruraru o te motu nei. Koia tenei. E hoa, taku tikanga. I naianei kahore ahau i mohio noa ki nga mahi o to taua hoa a te Kerei, i te painga i te kinonga ranei o ana whakaaro. Kia roa pea, ka mohio ahau ki ona whakaaro. He pai to tikanga, pai rawa, tika rawa. Heoi ano te kai pupnru, kahore ahau e mohio ki nga whakaaro o te Kawana kei maumau whakawa pea, muri iho ka whawhai atu ano ki tetahi atu wahi, ina hoki, kua mohio ahau inaianei ki etahi tikanga o te Kawana, tupato rawa ahau. He tangata no Patumahoe, ko Perereka te ingoa, i haere ia ki Taranaki, tuhituhi mai ana ia, kua tonoa ia e te Kawana ki te utu mo tana haerenga ki Taranaki ki te whawhai ko tetahi wahi tena o toku mohio, tetahi, ko te tohenga ki te whakanoho hoia ki te Ia ko enei oku wahi raruraru, e kore nei ahau e whakaae kia whakawhakia a Waitara inaianei, engari kia kore tikanga a te Kawana kia pai nga whakaaro, kia pai nga mahi ka whakaae ahau. Ko tenei e Hoa, taihoa atu taua e whakarite, kia tirotiro ahau i roto i enei takiwa, tera atu pea tetahi mahi a te Kawana, kei te ngaro i oku kanohi tera pea e kitea a muri atu koia nei taku tupato kei maumau whakarite noa taua tera pea he pakanga ano. Heoi taku korero atu ki a koe.