.jpg)
Nga kōrero a Reweti Kohere Mā
HE KUPU WHAKAMARAMA
HE KUPU WHAKAMARAMA
Kua roa kē ēnei kōrero e takoto ana i roto i nga kōkoru pukapuka i Poneke, e whanga ana mo te wā e whakaputaia hei ngongo ma nga hinengaro o te hunga e kaingākau ana ki ētahi kōrero i waihangatia mai e o tātau mātua. Kāwātu kē nga uri e auē ana mo ētahi kōrero pēnei i ēnei nei, ā, kātahi anō ka puta kia puhipuhia e nga hau, kia whitia e te rā.
He maha nga kōrero kua tuhia kētia e o tātau mātua, ā, kaore anō kia puta mai hei whāngai i nga whakatipuranga katoa. ētahi o ēnei tuhituhinga kei tēnā whānau kei tēnā whānau tonu e pupuri ana. Tērā pea me mau tonu ēnei ki roto i o rātou ringa. Otirā he nui nga tuhituhinga kei roto i nga ana pupuri pukapuka o Tamaki Makaurau, o Te Whanganui a Tara, o Otepoti me ētahi atu taone nunui.
Tērā pea ma nga kupu a Taumata kōrero e para te huarahi mo nga kōrero kei te ngaro. Arā hoki kei te whānau tonu a Reweti tētahi pukapuka anō, a tōna wā tata nei pea ka tāngia tēnei.
Na māua hoki i hūrapa nga pukapuka o Te Toa Takitini me Te Pīpīwharauroa kei roto i nga kōkoru o Te Puna Mātauranga e takoto ana. Te take o tēnei mahi, he āhua pūrata o te kite atu i ētahi kupu tino nui nei, i runga i nga pepa i homaitia ki a māua. I a māua e ketuketu ana i ēnei pukapuka, ka kite māua i te kaupapa o te mahi a Reweti. He pēnei tana kaupapa. Tuatahi, nāna anō i hoatu he īngoa hou mo ētahi o nga tuhituhinga kia takoto mārama ai ki raro i te kaupapa kotahi nāna nei i waihanga. Nāna anō i hoatu ētahi kupu tāpiri, me nga kupu whakamārama i raro, o ētahi o nga tuhituhinga. I mau tonu māua ki nga kōrero hou me te ingoa hou a Reweti, engari na māua anō i hoatu he kupu whakamārama mo te huarahi mai o aua tuhinga me te ingoa tūturu a nga kaituhi.
E rua nga wāhanga o tēnei pukapuka. Ko te wāhanga tuatahi ko Taumata kōrero. Ko te wāhanga tuarua ko Matariki. Ko te whakaotinga kei ētahi kōrero paki na Reweti i whakawhāiti mai.
Kia ora tātou katoa.
Te Ohorere me Wiremu Kaa