page (1)

He Waiata Na Te Tupuna A Matou Na Te Rangi-Tua-Rua
(Puke-Tapu / Nga-Ti-Rahiri)

E noho ana au i taku marae
I te whaka-marumaru o Tu-kapua
Kaore ana ra taku kahu topa topa
Kaore ana ra taku kaeaea kai kino
Haere e te hoa i nga po titotitoi a uru
Te turanga Tama-tea i te kihi a te rake
I te motiro no Rangi nana te kahui ao, e ra,
Te puke i ahu-nuku, te puke i ahu Rangi
Ko nga puke tena tu ai
Nga whakauru mate o Rangi
Totohu raua ko Rangi-kekero
Ko te kohi i mua
Ko te kohi i roto
Me tao ki te umu
Te umu o Rongo-mai
I rere te hinu
Tena i horua ai
A Ihenga raua ko Rongo-mai
I eke ai ki te tatau o te po
Kaore i hoki ake
To raua arataki a whenua
Nona te tere i te pohutu-kawa, e, ra
Ka tere te whenua i a Maui
Kopekopea kautia e Kupe
Koia i moana-uri, i moana-tea
Miroiti pakora tai ki Hawaiki, e, ra.
Ko te ara o Moe-takainga
I werohia ai te pu o te hau
Tikina atu ai a Matangia
Matangi taupe te whanau toa a Raka-maomao
Tinaia ka mate te kahui tara

page (2)

Nona te hurihanga i Mata-oho(eho)
Koia tana ka whatiwhati paku nei.
Huri mai e te hoa
I waho te anu anu
I te matao i one i ahuahua e Tiki
Ka tupu hei tangata
Ka awhi Rangi, ka awhi ki a Papa
Nona te whaka awhiawhitanga
Te aitanga a Tiki auaha
Ko Tu-maunga, tu mounga, tu parara
Te kahui-tu, te ano a Tu
Kahu-kura i taho-toki
Maka ki te mapuna wai
Ko Ngaro-whaka-tumumu
Mana koe e tangi na
E iri e te hoa i runga
I nga kaha i whiria e Maui
Whiri ki uta, whiri ki tai
Whiri ki Tanga-roa
Tangaroa te whatu moana
Te kukuti o te Rangi
E whiri ra e taku kaha
Te kaha tena i herua ai a Matuku
Whiri napenape
Whiri nape napea
Te kaha i herea ai te Marama
Tineia te whetu o te Rangi
Takahia te moana
Ka haere ka whai te ara
O Tonga raua ko Ha
I whanake ai i heke i te matai ao
O te whare o wai-o-rangi, e, ra.
Tikina atu ai Tu-mou-rea
I kai a te pupu
page (3) Te hoata rangi hei tahu mo te tangata
Ka pou te tomai a te Pa e ra.
Tikina atu ai numinumia (to huk ……….)
Whatiwhatia nga matikuku
I te ringa o Mahuika
Ka rongo mamaetia
Nona te huakanga e.
Kaore e te hoa
He ara i ngaro nei
Ko te Ra-kumia nana i tiki
Te kura ki runga nei
Nona te huakanga (riakanga) e
Tai whanake rua
Whanake riakina
Tino whakahihi to ara ki runga
Ki a Rangi-nui
Kia rokohanga atu raua ko tona tama
Ko Whaka-rehua, e whai ana te tau
O Pare-i-rangi-tahia, i Rangi-kama
I te tukunga
I te ihonga
Te heketanga
Tikina atu ai nga houhanga
Nga turu turu
Nga uru-pou
Tu ki Manu-kapiti
Pana, ka tu ki nga hoa pae-ahua
Whaka whitia iho i reira
Turanga-kopa
Tumuranga a Ahu-nuku, Ahu-rangi
Ko nga papa o Maru
I waiho atu i te uru o Tawhiti-nui
Nana i hora te kura
Te muri-wai o Hawaiki, e, ra.
page (4) Ka rere a Mahuru
Ka rere Pae aki
Ka whiwhi Rongo-rongo
Hei rawenga ringa
Mona ki runga ki Ao-tea
Ka eke te kiore kai kete
Te potiki toa, te whaka-hemanga-iti a Pani
Ka eke te pukeko kai tau
Ki te poike o Tokomaru
Nga manu tara kaka a Hou-mea
Ka-rere ata po,
Hurihia ana ki roto ki te moana
Nona te whaka-tamaratonga
Kia whakarongo mai te tohunga whiti korero
Kia eke ai taua ki takai a waka
Ki te tuwhenua, e, ra.
Aki-aki kau ana nga tai o te wai
Ka riro ra e taku manu whaka ruru
Te nohoanga taku patutu
Whakawiri te nohoanga wheke
Taku whaka wehi wehi
Taku arai riri e hoa ai
Kaore e te hoa he koha maku
Ki a koe, te kahui pou
Nana i tiki te whakairo
Ki te muriwai o Hawaiki
Kia rokohanga atu ki reira
Te kahui-tara, e taiaroa mai ana
Homai ai, ko Whiua, ko Maka
Maka te tua, Maka te aro
Maka purepure
Ka titi mata I Waowa-te-rangi
Hei rawenga ringa moku
Kia noho mai koe
Koe papa totara, e - I, e.