Title: Proceedings of of the Kohimarama Conference, Comprising Nos. 13 to 18 of the “Maori Messenger.”

Publication details: Auckland

Part of: He reo ture nō te taha Kāwana / Language of the Crown

License: Creative Commons Attribution-Share Alike 3.0 New Zealand Licence

Na Ngatitoa. No. 1.

Ka tahi nei au ka ora ake i te mate nei. Ka mahara au kia tuhituhi pukapuka atu ki a koe, hei whakamoemiti atu maku ki a koe, ki taku Ariki, mo te marama o nga kupu o tau pukapuka i panuitia ra ki a matou i te 10 o nga ra o Hurae, i te tau 1860. Marama katoa o kupu ki taku whakaaro, me taku korero i taua pukapuka. Kei te nui taku pouri me ka tupu ake tenei ingoa pokanoa i rnuga atu o Akarana, otira me tami haere kia ngaro whakarere atu tenei ingoa tutua i runga i tenei motu. Kahore hoki e taea e au te whakaputa kei nga kupu ahuarekareka nui ki toku ngakau mo te aroha mau tonu o te Kuini ki tona iwi Maori, haunga te iwi e whawhai mai nei ki a te Kuini i Taranaki; otira ko nga tamariki e noho tonu nei ki raro i te mana o te Kuini o Ingarani, o Niu Tireni hoki. Ka marama hoki to kupu kia whakaaetia mai e koe o matou whenua kia ruritia i runga i nga tikanga marama o Ingarani. Ka koa matou mo tenei, ka tahi ka marama. Kahore he kupu whakahe a te runanga nei mou mo runga i te pakanga a Wiremu Kingi e whawhai mai nei ki a te Kuini. Kua marama katoa hoki nga tikanga i te whakahaerenga mai a Makarini i page 29 nga tikanga o taua kainga, o Taranaki. Katahi nei ka mohio te runanga nei na Wiremu Kingi ano tana he ki te whakatupu whawhai mai ki a te Kuini.