The Ancient History of the Maori, His Mythology and Traditions. Nga-Ti-Whatua [Vol. XIII]
Iwi-Ka-Tere
Iwi-Ka-Tere
Na Iwi-ka-tere te mokai Koko (Tui) i akona ki nga karakia katoa, me nga korero katoa, me nga mahi katoa a te tangata, a matau ana taua manu ki nga ritenga katoa, ki nga matauranga katoa, a nui rawa atu te matau o taua manu, a riro katoa mana te whakahaere, me nga karakia, a ka tae ki te ngahuru o pou-tu-te-rangi, mana katoa e pure nga maara kumara, he nui te matau o taua manu, a tae ana ki te tahi tau, ka tahi ka tonoa atu e Tama-te-ra tona tangata haere ki a Iwi-ka-tere kia homai tana manu hei karakia i ana maara kumara, ka haere te tangata ka ki atu ki a Iwi-ka-tere "I haere mai au ki te tiki mai i to manu, hei pure i a matou kumara." Ka ki atu a Iwi-ka-tere "Taihoa, kaore ano aku kumara i purea, kia oti aku te pure ka tiki mai ai." Hoki ana tangata ra ka tae ki a Tama-te-ra, ka riri, ka tahi a Tama-te-ra ka ki atu "Akuanei ka po, kia warea nga tangata e te moe, ka haere ai koe ki te whanako (tahae) mai i te manu a Iwi-ka-tere," a i te po ka warea te Pa e te moe, ka haere te tangata a Tama-te-ra, ka tono ki te Pa, kua moe katoa te Pa, a, ka haere atu te whanako ra ki te whare a Iwi-ka-tere raua ko tana mokai manu ra, e haere atu ana ano te tangata ra kua mohio te manu ra, kei te haere atu te whanako ra, ki te tahae i aia, a ka timata te whakaora a te manu ra i tana rangatira, karanga noa ki tona ariki, karanga noa, moe tonu a Iwi-ka-tere, ka karanga te manu ra "E Iwi ka riro au, e Iwi ka riro au, e ara ka riro au." Ka mau te ringa o te whanako ra ki te manu ra page (59)(8)(2)haere atu ana i aia ka riro. I te ata ka ara a Iwi-ka-tere ka whakarongo kia korero te manu ra, a kore noa iho taua manu i korero, a ka puta aia ki te titiro, e kua kore tana manu, ko te mahi hoki a taua manu, e haere ake ana te ata ka korero, ka whakarongo te iwi katoa ki nga korero o te ra e panui ana taua manu, ka tangi a Iwi-ka-tere ki tana manu ka riro nei hoki i te whanako, a i mohio aia na Tama-te-ra i whanako, ka hui te taua, a ka haere, ko Te-kaura-kai-rapaki ka mate, ko te ngaki mate tenei mo te manu ra, ka mau te riri i konei, a ka tahi ra: ano ka amiotia e Iwi-ka-tere puta noa ki Turanga, a ka haere mai, haere ana ki te tahi, haere ana ki te tahi kakapiti ana ki te Waiau ka mate te taha ki te whanako ki a Tama-tea ko Taupara he parekura, he mano ki te matenga mo te mokai a Iwi-ka-tere, ka whati mai a Ngarengare i te Wai-roa, a ka mahue atu a reira na Iwi-ka-tere, a me ona uri e noho mai nei ano, ko Ngarengare me tana tama, me Tama-te-ra noho noa mai ko Here-taunga, ka noho, puta ake ana uri e noho i Here-taunga nei a puta noa ki Wai-rarapa, i hoki ano ia e tahi o ana uri ki te Wai-roa, a na te whanako nei nga rangatira e noho i Heretaunga nei, na ko te whakapapa mai tenei o Ngarengare:
Ngarengare
Tama-te-ra
Hine-te-moa
Whatiapiti
Rangi-wawahia
Rangi-hirawea
Hopara
Homata-i-te-rangi
Kukanga
Whakamarino
Ropiha
Hori Ropiha